langsam langsam
immer schneller
ois verschwimmt
hea bloss ned auf
mond oder stern
ois is am leichtn
hellliachta dog
in da stockfinstern nacht
ois stampft und brennt
um uns gehts zua
fliag um di rum
nix is wia's war
packst mi
hoitst mi
heid samma ganz
drah di
drah mi
und tanz tanz tanz...
a spur im woid
a blick, a wort
a stoa im wasser
und wieder fort
weiche haar
raue haut
lachst und woanst
staad und laut
nackerte fiass
durchs nasse gras
ois dampft vom regn
d'sonn kimmt raus
wos wirklich bleibt
is des wos'd spürst
wos'd spürst is jetz
und jetz is echt.
es ziagt und reisst
schnappt zua und beisst
tiafe kratzer
brennan wia d'sau
wos is des nur
woasstas genau
schlogst um di und kämpfst
a verlorens spui
der oanzige der gwinnt
is des saudumme gfui
spring nei und spürs
wennst luft schnappst und tauchst
und wasch da ois runter
wos'd nimmer brauchst
s'wasser nimmts mit
und lösts für di auf
s'brennen wird leichter
vertrau eam
und schnauf.
grod wars no do
schleicht umanand
macht grosse augn
und schaut di o
gehst auf sie zua
und scho is furt
hoits bloss ned fest
do kriagts a wuat
woass ned wos mecht
und wo's ihr taugt
sie dad gern bleibn
aber traut si ned recht
gleich wo sie si rumtreibt
und wia sie si ziert
irgendwann kimmts scho
und traut si
und bleibt.
moi gross... moi kloa
ganz wia er mecht
moi schwarz... moi weiss
er macht si's recht
d'welt draht und draht
vui z'schnell und wuid
ois spuid verruckt
nur oan losst's koid
bleibt wos er is
und wos er war
ois ändert si
nur er bleibt do
wennst moi ned woasst
woher und wohi
hoit staad
schau rauf
i denk an di.
ois wos ma erlebn
und ois wos ma segn
ois wos ma spürn
und ois wos ma dan
a spur davo bleibt, a kerbn im hoiz
moi duads weh und moi ned
aber ganz werd ma's ned los
es is guad so wia's is
a wenn's manchmoi gscheid zwickt
a jedem sei kerbhoiz
und jedem sei gschicht.
sog wos'd song mogst
und ned wos d'leit hean woin
tua wos dir am herzn liegt
trau di. schaffst scho.
spinn wennst spinna mogst
normale gibt's eh scho z'vui
geh wenn's di wegziagt
und bleib wenn's da taugt
verlass di auf dei gfui
weil des is wos bleibt
schoit dein kopf aus und mach
weil mia alle ned wiss'n
wiavui sommer mia no ham.
grad war's no guad.
und scho packts mi wieder.
sticht mi. kitzelt mi. beisst mi in d'fiass.
und i renn los. renn. und renn.
bevor's ma de haxn wegziagt.
tauch unter. tauch wieder auf.
fliag davo. weit weg von da welt.
aufgwuselt.
seh koan baam und a koan woid.
hoi mi runter
wenn i wieder moi ned woass
wo vorn und hintn is.
d'fiass fest am bodn
an kopf in da sonn
spürst an reng... spürst an wind
moi ganz staad und moi wuid
wenns sei muass gibst noch
aber tuast trotzdem wos'd mogst
host a mords kraft
aber tuast koam weh
woasst wo'sd dahoam bist
und segst doch de welt
wia a baam mog i sei
host an hoit und bist frei.
hoass. koid.
brenn di. dafrier.
weich. hart.
leg di nei. hoits aus.
hell. dunkel.
mach de augn zua und spür's.
mit deim ganzn herzn.
barfuass durch und durch.
